Здравјето на севернокорејскиот лидер Ким Џонг Ун е честа тема на шпекулации поради политички последици во случај да не е во можност да ги врши неговите должности, бидејќи засега не е познато кој би можел да биде негов заменик.
Севернокорејскиот лидер навистина ослабел 20 килограми откако претходно имал околу 140 килограми, но изгледа дека нема здравствени проблеми, соопшти известувачката служба од Јужна Кореја.
Извештајот даден од Националната известувачка служба (НИС) во текот на седницата на парламентот, зад затворени врати, ги отфрли шпекулациите дека Пјонгјанг користеле двојник во текот на неодамнешниот јавен настап, соопшти пред новинарите еден од пратениците на владејачката Демократска партија.
Лидерот на Северна Кореја е здрав и сака да ја зголеми лојалноста на јавноста додека се влошуваат економските проблеми во земјата, изјавија од известувачката служба на Јужна Кореја. Тие дошле до овие информации преку употреба на техники на вештачка интелигенција, анализа на видеоснимки и други методи со кои ја анализирале состојбата на Ким.
