Севернокорејскиот лидер Ким Џонг Ун на неговото прво јавно појавување по повеќе од еден месец посети новоизграден град во близина на границата со Кина, пренесоа државните медиуми.
Самијон, новиот град на северот на земјата, се претвора во голем економски центар, а тамошните луѓе го нарекуваат „социјалистичка утопија“. Во него се наоѓаат нови станови, хотели, ски-центри, како и комерцијални, културни и здравствени објекти.
Градот е сместен во близина на „светата планина“ Пекту, за која семејството на Ким тврди дека потекнува оттаму. Ким Џон Ун повеќе пати ја посети споменатата планина од 2018 година, а државната новинска агенција KCNA ја прикажува како „отелотворена модерна цивилизација“.
KCNA пренесе дека севернокорејскиот лидер во последната посета на Самијон проверил како напредуваат работите во третата, воедно и последна фаза на изградба. Крајот на работите се очекува кон крајот на годинава, процесот беше одложен поради меѓународните санкции и пандемијата на коронавирусот.
„Ким Џонг Ун изјави дека Самијон се претвора во пример на модерен, социјалистички и планински град кој претставува добар пример на рурален развој благодарение на непоколебливата работничка истрајност и покрај неповолните климатски услови“, пренесе KCNA.
Ким додаде дека изградбата на новиот град дава искуство во градежништвото, дизајнот и употреба на најнова технологија, што ќе го поттикне економскиот развој на останатите региони во земјата.
