Севернокорејскиот лидер Ким Џонг Ун лично го надгледуваше пробното истрелување на најмоќната интерконтинентална балистичка ракета во земјата (ICBM), во друштво на ќерка му, покажуваат фотографиите на државните медиуми.
Вчерашното лансирање, второто тестирање на ICBM на Пјонгјанг во годината, вклучуваше ракета Hwasong-17, објави официјалната корејска новинска агенција, додавајќи дека таа била истрелана како одговор на „избезумените“ заеднички американско-јужнокорејски воени вежби.
Фотографиите покажаа како Ким го гледа црно-белиот Hwasong-17, кој аналитичарите го нарекоа „монструозен проектил“, како полетува кон небото.
На други фотографии е на лансирањето со ќерка му, чие име не е спомнато во државните медиуми, но од јужнокорејското разузнавање беше идентификувана како неговото второ дете Џу Ае.
Државните медиуми објавија и слики на кои се гледа Земјата од вселената, наводно направени од камера поставена на ICBM.
Корејската новинска агенција соопшти дека лансирањето „ја потврдило воената готовност на единицата ICBM“, додавајќи дека тоа „немало негативно влијание врз безбедноста“ на соседните земји.
Јужна Кореја претходно соопшти дека проектилот бил истрелан по нагорна траекторија наместо кон надвор, што обично се прави за да се избегне прелетување од соседните земји.
Теоретски, Hwasong-17 ICBM може да стигне до континенталниот дел на САД, а со ова последно лансирање, Северна Кореја се обидува да го нагласи напредното ниво на своето оружје, велат аналитичарите.
„Со фотографиите на Земјата, Пјонгјанг се обидува да покаже дека може прецизно да погоди која било цел што режимот ја сака со својот ICBM“, изјави за AFP Чеонг Сеонг-чанг, висок соработник во Институтот Сејонг.
Следниот чекор најверојатно ќе биде Северна Кореја да ја истрела ракетата „под нормален агол“, што ќе покаже дека може да преживее повторното влегување во атмосферата.
