Џорџо Кјелини е подготвен да ја започне новата авантура во САД откако потпиша 18-месечен договор со МЛС тимот на Лос Анџелес.
Ветеранот, кој на 14 август ќе го прослави својот 38. роденден, одлучи да го напушти Јувентус откако Италија не успеа да се квалификува на Мундијалот 2022 во Катар, бидејќи сега веќе не мора да игра на високо ниво и да биде блиску до селекторот Манчини.
Наместо да ја заврши кариерата во Торино, Кјелини одлучи како многумина фудбалери во поодмината возраст, да се проба во американската МЛС и тоа во тимот на Лос Анџелес, вториот тим од истоимениот град после попознатиот Лос Анџелес Галакси.
Централниот дефанзивец потпиша договор на 18 месеци со клубот кој минатата сезона имаше разочарувачки резултати и не успеа да влезе во разигрувањето за титулата. Затоа, пак, во тековнава сезона, која почна кон крајот на февруари, тимот игра одлично и е лидер во Западната конференција и бодовно е најдобар во цел МЛС.
„Целта е да победуваме, а дечково има победувано на највисоко ниво. Тој е еден и единствен. Во мојата играчка кариера никогаш не сретнав некој играч како него. Ниту личност како него“, рече ко-претседателот и извршен директор на клубот, Џон Торингтон, кој порано беше играч од средниот ред.
„Ретки се играчите како Џорџо кои имаат освојувано, кои биле капитени, за кои сите зборуваат на посебен начин. Кога ни се пружа шанса да го ангажираме на начин што можеме да си го дозволиме економски, имаше смисла за нашиот бизнис и што на тимот му требаше на терен, не требаше многу да му ја мислиме“, додаде тој.
Кјелини иако потпиша сега, нема право да игра за својот нов клуб. Сезоната во МЛС е во тек, но трансфер периодот таму се отвора на 7 јули. Тоа значи дека може да дебитира на 9 јули во градското дерби против Галакси, или пак на 18-ти во гостувањето кај Нешвил.
Во новиот клуб Кјелини ќе го носи дресот со број 14. Најпознат соиграч му е Мексиканецот Карлос Вела, а во тимот е и несудениот македонски репрезентативец Дени Мусовски.
