Поради бројни случаи на згрутчување крв по примање на вакцината на AstraZeneca, заклучно со денес вкупно 24 земји ширум светот ја прекинаа вакцинацијата со оваа вакцина.
Англиско-шведската вакцина секој ден доживува нови удари откако се зголемува бројот на држави кои престануваат да ја употребуваат, како причина наведувајќи здравствени компликации кај лица кои ја примиле вакцината.
Правата земја која ја откажа AstraZeneca е Данска, а по неа следуваа Норвешка и Ирска. На Стариот континент на ова трио им се придружија и Португалија, Шпанија, Франција, Италија, Исланд, Германија, Холандија, Луксембург, Австрија, Словенија, Естонија, Латвија, Литванија, Романија, Бугарија и Кипар, а интересно, на листата е и Шведска, земјата од каде е поранешната компанија Astra формирана уште во 1913 година и која во 1999 се здружи со британската Zeneca формирајќи ја денешната AstraZeneca.
Во Јужна Америка само Венецуела ја има стопирано вакцината, додека во Африка само Конго ДР. Таму и Јужна Африка не ја употребува, но не ја стопираше поради компликации туку поради тоа што оцени дека е неефикасна против јужноафриканскиот сој.
Во Азија само Тајланд и Индонезија ја стопираа.
Засега нема стопирања во Северна Америка и во Океанија.
СЗО и ЕМА и натаму велат дека вакцината е сигурна и дека државите треба да продолжат да ја употребуваат. Во соопштение, ЕМА објави дека „илјадници луѓе годишно имаат згрутчување на крвта во ЕУ и тоа поради различни причини“ и дека „бројот на такви случаи поврзани со вакцината не е поголем од од просекот генерално“. Додава и дека „сега за сега останува гледиштето дека придобивките од AstraZeneca вакцината во борбата со хоспитализација или смрт од COVID-19 се поголеми од ризикот од несакани ефекти“. Најави и дека в четврток ќе се произнесе за понатамошни насоки во врска со вакцината.