Сведоци сме на вселенска трка во која бројни влади и најбогати луѓе се тркаат кој прв ќе ја колонизира Црвената планета, но дали е возможен човечки живот таму во моментов?
Што му е неопходно на човекот за живот на Марс? Најосновните работи се: вода, храна и кислород. И стотици други работи, како засолниште од опасното зрачење итн., но горенаведеното е токму она основното.
На Земјата, растенијата и некои бактерии произведуваат доволно кислород за живот, иако овој гас не е единствениот во атмосферата што го дишеме. Го има околу 21%, а најмногу има азот: 78%. Азотот има своја функција, но не ни е потребен за дишење и го ослободуваме при секое издишување.
Атмосферата на Марс е многу поскромна од нашата, земјината - дури 100 пати - и претежно е составена од јаглерод диоксид. Дури 96% од атмосферата на Марс е составена од овој гас, додека таму речиси и да нема кислород.
Вака изгледа структурата на атмосферата на Марс:
- 95,97% јаглерод диоксид
- 1,93% аргон
- 1,89% азот
- 0,146% кислород
- 0,0557% јаглерод моноксид
- 0,0210% водена пареа
Ако ве интересира зошто Марс има толку ретка атмосфера - тоа е главно поради тоа што е двојно помал од нашата планета, па неговата гравитација е слаба и затоа не е доволно силна за да ги задржи честичките од гас, кои преку еоните се распрснуваат во меѓупланетарниот простор.
Добро, да се вратиме на дишењето на Црвената планета: ако одеднаш се најдовте некаде на неа без скафандер, ќе почнете да се гушите со првиот здив, бидејќи јаглерод диоксидот е отровен за нашиот организам.
Освен тоа, дури и да има доволно кислород во нејзината атмосфера, нашите земјени бели дробови нема да можат да дишат доволно од воздухот што му е потребен на нашето тело од таква ретка атмосфера, па сето тоа би завршило за една минута, најмногу две. Ете толку би успеале да преживееме на Марс без скафандер.