Очајната форма на Ливерпул и црната серија почна да подгрева шпекулации, а најинтересната е дека легендата Стивен Џерард ќе се врати на „Енфилд“.
Еден ден Стиви Џи ќе го води Ливерпул. Тоа на сите им е јасно како ден. Човекот кој ја почна кариерата во младинскиот тим и потоа за сениорскиот настапуваше од 1998 до 2015 година сега е успешен тренер предводејќи го шкотски Ренџерс.
„Црвените“ под водство на Клоп триумфираа во Лигата на шампионите, а лани ја прекинаа клетвата и конечно ја освоија Премиер лигата. Но, Ливерпул е во голема криза која синоќа веројатно го допре дното кога дома загуби од слабиот Фулам.
Тимот на Јирген Клоп е во серија од 8 натпревари без победа на домашен терен од кој 6 порази и тоа во низа. За одбрана на титулата веќе одамна никој не зборува, а сега прашањето е дали тимот ќе успее да се пласира во Лигата на шампионите наредната сезона.
„Мислам дека шансите за Стивен да седне на клупата на Ливерпул во блиска иднина се нула“, вели поранешниот претседател на Ренџерс, Дејв Кинг.
„Ќе наведам две причини за тоа. Прво, Ливерпул како клуб никогаш лесно не се откажувал од своите тренери. Клоп заврши фантастична работа таму. Имаат тешка сезона, но тој сепак е врвен тренер и мислам дека ќе остане и наредната сезона и ќе продолжи да биде успешен“.
„Второ, Стивен не е тип на личност која раскинува договор. Стивен го продолжи својот договор со Ренџерс и тоа потполно свесен дека од него се бара освојување на титулата и потоа нејзина одбрана. Пласман во Лигата на шампионите е друг успех кој се бара. Мислам дека Стивен нема да се задоволи само со титула, знам дека сака потоа да ја брани и знам дека сака да дојде и до Лигата на шампионите“
На 6 кола до крајот во шкотската лига, Џерард веќе му ја донесе титулата на Ренџерс, прва по 9 години. Последен пат клубот беше шампион во сезоната 2010/11.
