Тренерот на Интер има оправдување за лошата одбрана на дуелот со Фиорентина. Настрана офанзивната тактика, ако можат Манчестер Сити и Баерн да примат по 5 односно 4 голови, зошто да не може Интер 3.
Антонио Конте денеска одржа прес-конференција по повод утрешниот натпревар против Беневенто на која главна теме беше килавата одбрана која неговиот тим ја демонстрираше во саботата.
„Јас не знам колку други екипи играат како нас, со двајца напаѓачи, треквартиста и две крила. Ние одиме напред, без одлед на сѐ. Сакаме да играме офанзивен фудбал. Но, јасно е дека кога ќе се загуби топката мора веднаш да се покријат правите зони на теренот“, почнува да објаснува Конте како дошло до три гола во мрежата на Хандановиќ.
Конте доби критики затоа што Интер прими дури 3 голови дома од Фиорентина и тоа барем два од нив беа по грешки и конфузии во одбраната.
„Англичаните велат 'enjoy'... епа, јас се забавував, ми се допадна натпреварот и тоа им го кажав и на момците. Нѐ изненадија, нѐ фатија неподготвени при некои од головите, но тоа не зависи само од едно нешто, туку најмногу од бројот на играчи со кои одиме во напад“.
„Еве дури и Баерн прими 4 во неделата, а пак Сити 5... сакаме да играме напред, но и да најдеме баланс со одбраната“.
Навистина, Манчестер Сити во неделата загуби со 2:5 дома од Лестер, додека Баерн со 4:1 падна на гостувањето кај Хофенхајм.
„Ќе менуваме тактика од низок пресинг до висок. Тактиката од крајот со Фиорентина, со Санчес треквартиста и тројца во средината зад него, исто така останува опција, но само за во тек на натпревар бидејќи од почеток би значело многу играчи да останат отсечени“, рече Конте.