Вечерва ќе се бара вториот финалист во второто по квалитет европско клупско натпреварување, а копјата ќе ги вкрстат италијански Интер и украински Шахтар.
Предводникот на „Нераѕурите“, Антонио Конте, не стравува од Украинците кои секогаш пружале добри партии, како во Лигата на шампиони, така и во Лига Европа. Всушност, тимот од Донецк секогаш имал одлични фудбалери, а дел од нив денес играат во најдобрите клубови ширум Стариот континент.
„Се работи за состав полн таленти, а управата и покрај промената на тренери успеа да го задржи високото ниво на работа. Со Шахтар играв кога бев во Јувентус и уште тогаш имаше играчи од типот на Вилијан, Мхитарјан, Луис Адријану, Пјатов, Срна. Сѐ на сѐ, секогаш имале добри играчи, а ги имаат и сега. Пофалба за нив и за нивната управа која секогаш наоѓа силни таленти“, вели Конте.
Шахтар цели 12 години ги предводеше Романецот Мирчеа Луческу со кого ја освоија првата и единствена европска титула кога во сезоната 2008/09 триумфираа во УЕФА Купот. Во 2016 на клупата седна Португалецот Паулу Фонсека, а од минатото лето предводник е неговиот сонародник Луиш Кастру. Сите освојуваа домашни титули. Од ерата на Луческо до денес тимот освои 12 титули шампион на Украина, 9 пати Купот на Украина и 9 пати домашниот Суперкуп.
„Зборот страв не постои во мојот вокабулар и не смее да биде дел ниту во оној на моите играчи. Имаме голема почит за Шахтар бидејќи имата квалитетни играчи. Се подготвувавме многу добро, јасно е дека ова е најсилниот тим со кој се соочуваме до сега во Лига Европа. Ќе им се спротивставиме со почит и со желба да докажеме дека со причина сме во полуфиналето и скапо ќе си ја продадеме кожата за да стигнеме до финалето“, смета италијанскиот стратег.
Натпреварот се игра вечерва со почеток од 21 часот на „Меркур Шпил-Арена“ стадионот во Дизелдорф. Правдата ќе ја дели Полјакот Шимон Марцињак.
