Пораз со 82:73 доживеа македонската кошаркарска репрезентација на вечерашното гостување во Левице против Словачка.
Избраниците на селекторот Александар Јончевски не успеаја да ја продолжат победничката серија во групата Д од претквалификациите за ЕвроБаскетот 2025 и го запишаа првиот пораз по четирите победи.
Најефикасен во македонскиот состав беше Ти-Џеј Шортс со 24 поени, а Бојан Крстевски постигна 14.
Словаците до третата победа во групата ги предводеше Шимон Крајчович со 23 поени, а дабл-дабл учинок со 15 поени и 13 скокови имаше 18-годишниот Тимотеј Маловец.
Во вториот натпревар од 5. коло во оваа група вечерва играат Данска и Норвешка.
На македонската репрезентација за сигурен пласман во квалификациите ѝ е потребна победа над Норвешка во Осло (26 февруари) во последното коло. Во спротивно, ќе зависиме од резултатите на другите репрезентации.