BMW го претстави концептот 2002 Hommage во чест на одбележувањето половина век од лансирањето на познатиот модел BMW 2002. Баварската компанија на манифестацијата Concorso d’Eleganza Villa d’Este, што традиционално се одржува во мај на брегот на езерото Комо во Италија, го покажа новиот концепт базиран на еден од култните автомобили од нивната историја.
Минатата година компанијата го претстави концептот 3.0 CSL Hommage со кој му одадоа чест на тркачкиот модел 3.0 CSL со кој успешно се натпреваруваа на европските првенства во текот на 70-тите години на минатиот век. Оваа година, тие одбележуваат 50 години од моделот BMW 2002.
Моделот 2002 е првиот сериски модел на компанијата кој има турбо мотор. Во разните верзии, овој автомобил се произведувал од 1966 до 1975 година кога е претставена првата генерација на Series 3.
Концептот 2002 Hommage ги комбинира дизајнот на модерните автомобили со по некој ретро детаљ, како што е обликот на светлата или ознаката turbo на предната маска. Автомобилот е поставен на 20 инчни алу фелни, а широките нископрофилни пневматици се кријат под масивните проширувања на лаковите.
Со оглед на тоа дека е дизајнерска студија, баварската компанија не објави детали за моторот или пак за перформансите.
