Косовскиот премиер Албин Курти зборуваше по киднапирањето на тројца косовски полицајци, кои, како што пишуваат косовските медиуми, биле киднапирани од српските специјалци од единицата Кобра.
Курти рече дека тројца косовски полицајци се киднапирани денеска во близина на Лепосавиќ, на место каде порано постоела илегална шверцерска рута, која се наоѓа на околу 300 метри во внатрешноста на територијата на Република Косово. РТС објави дека полицајците биле уапсени во Централна Србија.
„Се сомневаме дека биле киднапирани од српската војска, јасно како одмазда на Србија за вчерашното апсење на озлогласениот криминалец Милун Миленковиќ-Лунет, кој претставува еден од водачите на организираниот криминал и шверцот. Косовската полиција покажа дека е многу воздржана во последните недели. Влегувањето на српските сили на територијата на Косово е агресија и цел на ескалација и дестабилизација“, објави Курти.
На крајот, Курти побара итно ослободување на тројцата киднапирани полицајци и ги повика меѓународните фактори да го осудат чинот на агресија на Србија.