Леброн Џејмс ги нарече навивачите на Бостон расисти на прашањето во која НБА арена е најтешко да се игра поради притисокот од трибините.
И тоа не би било толку необично, бидејќи навивачите на Селтикс се познати како едни од најбруталните, барем за американски рамки, доколку Џејмс не беше еден од сопствениците на бејзбол франшизата во Бостон Ред Сокс преку неговиот сопственички удел во Fenway Sports Group.
Во новата епизода од своето ток-шоу The Shop, Леброн го издвои Бостон како место каде навивачите доаѓаат на натпревар со намера да не дозволат противниците да победат. На прашањето зошто го мрази Бостон, тој не се двоумеше: „Затоа што се расисти, затоа“.
Тој објасни дека навредите од трибините не му пречат, но ги слуша и додаде дека не е невообичаено тамошните навивачи да го таргетираат.
Имаат и специјални маици
„Ги слушам овие навреди, а ако слушнам некого во близина, набрзина го гледам и продолжувам со играта. И онака ќе кажат што сакаат. Можат и да фрлат нешто по тебе, еднаш ми фрлија пиво додека заминував теренот“, изјави четирикратниот НБА шампион.
„Имаат и маици на кои пишува ‘Кој го е*е ЛБЏ’, верувам дека се распродадени во клупската продавница“, додаде Леброн, а со него секако може да се сложи Дрејмонд Грин, кои слушаше скандирања за време на финалето меѓу Голден Стејт Вориорс и Селтикс во Бостон кога целата сала го навредуваше едногласно.