Полскиот напаѓач Роберт Левандовски во интервју за Marca уште еднаш им се извини на сите фанови на Баерн за напуштањето на клубот, додавајќи дека сега се чувствува како дете со нова играчка.
Левандовски со цело срце сакаше да го напушти Баерн и кариерата да ја продолжи во Барселона, а иако клубот на почетокот му ја затвори вратата и бараше 50 милиони евра од шпанскиот клуб, на крајот челниците на тимот од „Камп Ноу“ ја платија бараната сума и на тој начин беше обезбеден потписот на овој фантастичен напаѓач.
„Знам дека моето заминување погоди многу фанови, тоа можам да го разберам и за тоа сакам уште еднаш да се извинам. Беше важно и неопходно да сфатам дека сум подготвен за промена. На крајот, сите сме луѓе. По 12 години во Германија ми стана јасно дека моето време истече. Ситуацијата беше тешка за сите и моравме да ја најдеме најдобрата опција“, изјави Левандовски.
После тоа, тој вели дека многу му била потребна промена.
„Ми требаше промена, ми требаше патување во друга земја и друг клуб. Сега се чувствувам како дете со нова играчка“, изјави Левандовски.
Левандовски во изминатите 8 сезони во дресот на Баерн постигна 344 голови на 375 натпревари.
Во изминатите две сезони беше најдобар стрелец во Европа и добитник на Златната копачка, а ФИФА го прогласи за најдобар играч во светот во изминатите две сезони.