Политичката партија Левица побара од ОН да интервенираат во САД поради вчерашниот упад во Конгресот и немирите кои резултираа со четири жртви, десетици повредени и многу уапсени.
„Згрозени од вчерашните немири, поттикнати од обвинувања за нефер избори, во поранешните британски Тринаесет Колонии, политичката партија Левица изразува загриженост за состојбата на демократијата во северноамериканскиот регион“, вака новата парламентарна партија го почна своето барање до Обединетите Нации.
Интересно, Левица ниту еднаш не го употреби имаето на државата, САД, туку ја нарекува како поранешна британска колонија.
„Снимките и сликите како демонстрантите насилно влегуваат во законодавниот дом, како и фактот дека има извештаи за престрелки со огнено оружје во него кои резултираа и со човечки жртви, се показател дека локалните пост-колонијални власти не се способни да го зачуваат мирот, просперитетот и демократијата во нивната држава“, стои во партиското соопштение.
„Левица апелира до Советот за безбедност при Обединетите Нации под итно да испратат мировни сили и да воспостават контрола врз ситуацијата сѐ до оној момент во кој меѓународната заедница ќе оцени дека има услови да се одржат фер и демократски избори“.
