Додека во некои делови на Грција е потребно да се издвојат десет евра за лежалки и чадори, во други тие чинат речиси колку едно ноќевање во апартман.
Цените на услугите во популарните одморалишта се менуваат секоја година. На нивниот ненадеен скок најмногу влијае зголемениот број туристи, но и моменталните економски услови.
Секоја година на социјалните мрежи посетителите на омилената летна дестинација Грција ги споделуваат своите искуства, односно каде има најголема гужва, кое е најдобро место за одмор и што на крајот им е најважно на сите - кои се цените на храна, пијалоци, лежалки и се останато.
Во Facebook групата Live from Greece еден следбеник сподели каква е моменталната ситуација во Кефалонија, на плажата Коста Коста. Чадор и две лежалки од 1 јули до 31 август чинат 40 евра, но за првиот ред лежалки треба да платите 60 евра, а за вториот ред 50 евра.
Членовите на групата веднаш ја искористија приликата да се пошегуваат со цената, што непријатно ги изненади.
„А последниот ред?“, „Лежалката е поскапа од креветот“, „Само ако станеш во шест часот наутро“, „На Кипар две лежалки и чадор се 7,5 евра на сите плажи“, „Првиот ред е во вода, затоа се поскапи“, напишаа други корисници во коментари под објавата за цените на лежалките.
Речиси секоја туристичка агенција, како и порталите посветени на летните одморалишта, секогаш укажуваат дека цените на лежалките и чадорите на плажите не треба да ги загрижуваат туристите бидејќи, според нив, секогаш има дел од плажата каде што можете да поставите ваш сопствен чадор и пешкир.