Стартап компанија Lucid Motors која планира да развива и произведува електрични автомобили туку што го претстави својот прв модел Air. Овој автомобил треба да биде директна конкуренција на врвниот Model S на Tesla, a Lucid Air ќе чини 160.000 долари.
Lucid Air има два електрични мотори, едниот за предните, а другиот за задните тркала, кои заедно испорачуваат 1.000 коњски сили. Купувачите ќе имаат избор меѓу батерија од 100 kwh или 130 kwh, а втората нуди до 650 километри автономија.
Слично како и Model S P100D, двата мотори на Air ја прават оваа лимузина исклучително стартна, а според компанијата забрзувањето од 0-60 милји на час (96 километри на час) е 2,5 секунди што е идентично со P100D.
Иако компанијата се уште нема претставено сериски модел, концептот ветува атрактивен дизајн и гламурозна внатрешност.
Lucid планира да го пушти моделот Air на пазарот во 2018 година, а вели дека првите 250 автомобили ќе бидат целосно опремени и со цена од 160.000 долари. Резервациите се отворени со депозит од 25.000 долари, а откако ќе се појави врвниот модел, на пазарот ќе станат достапни и поевтини верзии.
