На најновата листа на Global Firepower (GFP), како воена сила, Македонија е рангирана на 108-то место од 145 земји.
Во споредба со лани ова е напредок за македонската армија и тоа за 27 места на листата за воена способност и моќ на армиите во светот.
Финализираното рангирање на Global Firepower користи над 60 индивидуални фактори за да го одреди резултатот PowerIndex на одредена нација со категории кои се движат од количина на воени единици и финансиска состојба до логистички способности и географија.
Рангирањето на нациите во светот е врз основа на моменталната достапна огнена моќ.
Од соседството, Грција е на 30. место, додека Србија на 58. место, Бугарија веднаш по неа на 59. место. Хрватска е на 69. место, Словенија на 86. место, додека Црна Гора на 128., а Босна и Херцеговина на 133. место. Косово е на 134. место на листата.
Први на листата се САД, втора е Русија, трета Кина, четврта Индија, на петтото место е Обединетото Кралство, шеста е Јужна Кореја, потоа следат Пакистан, Јапонија, Франција и Италија. Украина е на 15. место.
– Нашата единствена, внатрешна формула им овозможува на помалите, технолошки понапредни нации да се натпреваруваат со поголеми, помалку развиени моќи, а специјалните модификатори, во форма на бонуси и казни, се применуваат за дополнително да се усоврши списокот што се составува годишно. Стрелките во боја (зелена, сива и црвена) ја означуваат споредбата на трендовите од година во година (горе, стабилно, долу). Трендовите не мора да укажуваат на опаѓање на моќта бидејќи промените во формулата GFP исто така може да го оправдаат ова, се наведува на веб страницата на Global Firepower.