Македонската ракометна репрезентација вечерва загуби од Франција со 14:24 во својот прв настап на Европското првенство 2022.
Избраничките на селекторот Љубомир Савевски натпреварот во СЦ „Борис Трајковски“ го почнаа лошо и по 15 минути имаа негатива од 0:5. На првиот наш гол се чекаше до 16. минута кога погоди Јована Кипријановска. Во 21. минута македонската репрезентација се доближи на 3:6, но повторно следуваа пет врзани гола на Французинките за највисоки +8 во првото полувреме (3:11). На пауза се отиде со резултат 5:12.
Франција, која пред средбата важеше за апсолутен фаворит, слично го почна и второто полувреме. Со серија од 3:0 за првпат стигна до двоцифрена предност (5:15). Оваа разлика им овозможи на гостинките со рутинирана игра да дојдат до сигурна победа.
Најефикасна во македонскиот состав воедно и на натпреварот беше Моника Јанеска со 5 гола.
„Црвено-жолтите“ бодрени од околу 3.000 гледачи вечерва не успеаја да направат изненадување против актуелниот олимписки шампион, па шансата за први бодови ќе ја бараат в понеделник против Холандија.
Холанѓанките во терминот од 20:30 часот, исто така во „Борис Трајковски“, ќе играат со Романија по што ќе се комплетира првото коло во Ц групата на ова ЕУРО 2022 кое се одржува уште и во Црна Гора и Словенија.
