Ислам Махачев неодамна ја одбрани УФЦ титулата во лесна категорија. Со одлука на судиите, по пет рунди безмилосна борба го победи Александар Волкановски во главната борба на настанот УФЦ 284 што се одржа во Перт.
По долго време, Махачев не славеше лесно, Волкановски беше „тврд орев“, а по мечот имаше и такви кои сметаа дека ја заслужил победата.
Махачев е борец под протекција на Хабиб Нурмагомедов, а бил и еден од учениците на таткото на Хабиб, Абдулманап. Откако постариот Нурмагомедов почина, помладиот ја исполни желбата на мајка си да се посвети на семејството во тој момент и се повлече од спортот со скор 29-0. Сега истото можеби ќе го направи и Махачев, кој има скор 24-1.
„Мајка ми воопшто не ги гледа моите борби. Не само моите борби, туку борбите воопшто. Не сака да гледа како луѓето се удираат. Кога се вратив дома по освоената титула, ме пречекаа многу луѓе. Мајка ми ми рече: ‘Сега ти си шампион, оди во пензија, Хабиб ја послуша мајка си, ти кога ќе ме послушаш мене?“, рече 31-годишниот Махачев, а потоа додаде:
„Ѝ кажав на мајка ми дека Хабиб неколку пати го бранел појасот и дека морам и јас да го бранам мојот. Тоа е тешка тема за неа, но затоа татко ми го гледа секој натпревар и ужива во него".
