Легендарниот Паоло Малдини, заедно со Рики Масаро, се разрешени од функциите директори во Милан, објавија голем број италијански медиуми.
Иако клубот сѐ уште официјално не ја соопштил одлуката, претходно се шпекулираше дека тоа би можело да се случи бидејќи последната средба помеѓу Малдини и сопственикот на клубот поминала многу лошо. Имено, сопственикот на Милан, Џери Кардинале и Малдини се судрија бидејќи имаат сосема различни визии за начинот на кој клубот треба да се развива во иднина.
Претходно во интервјуата Малдини повторуваше дека е фрустриран од недостигот на средства за трансфери и ги повика сопствениците да вложат повеќе пари за да го направат клубот поконкурентен. Sky Sport Italia пренесува дека Кардинале на крајот од сезоната бил во Италија и дека синоќа се сретнал со Малдини, по што ситуацијата само се заострила.
Шефовите на RedBird, Кардинале и извршниот директор Џорџо Фурлани, сакаат да ги намалат трошоците и да го надоградат актуелниот бизнис модел, додека Малдини бараше средства за да го засили тимот.
Во меѓувреме, фудбалерите на Милан се на одмор, а клубот веќе договори три пријателски натпревари што ќе се одиграат во јули и август против Реал, Јувентус и Барселона.