Истиот ден кога Манчестер Јунајтед го избрка Кристијано Роналдо, BBC објави дека американското семејство Глејзер кое е сопственик на клубот од „Олд Трафорд“, сака да го продаде Јунајтед.
Сè уште не се знае, посочуваат Британците, дали ќе продадат само дел од акциите или целиот контролен пакет.
Американците го купија клубот во 2005 година за 790 милиони фунти, но последните неколку години особено се одбележани со голем револт на навивачите поради падот на резултатите на клубот. Извори од клубот тврдат дека „управата ќе ги разгледа сите стратешки алтернативи, вклучително и нови инвестиции, продажба на клубот и други трансакции“.
„Додека настојуваме да продолжиме да ја градиме историјата на успех на клубот, одборот одобри темелна проценка на стратешките алтернативи“, изјавија извршните копретседатели и директори Аврам Глејзер и Џоел Глејзер, додавајќи: „Ќе ги процениме сите опции за да се осигураме дека им служиме на нашите навивачи и Манчестер Јунајтед максимално ги искористува значајните можности за раст што ги има клубот денес и во иднина“.