Лука Модриќ одигра одлично во победата на Реал од 3:1 против Челси во првиот четвртфинален натпревар од Лигата на шампионите.
Тројниот стрелец Карим Бензема заслужено е прв меѓу фалените, но Модриќ е веднаш до него во извештаите на најчитаниот шпански весник.
„Којзнае која е лекцијата на Лука Модриќ, великанот кој никогаш не се уморува во владеењето со најголемата фудбалска сцена. Кај првакот на Европа одигра како што само тој знае, како играч кој на Реал му донесе три ЛШ титули по ред. Хрватот и на враќањето во Лондон покажа каков е, никогаш не разочарува на големи натпревари“.
„Крајно време е да се провери датумот на раѓање во пасошот и во изводот на родените“, пишува понатаму Marca, со чудење што Модриќ, на возраст од 36 години и 7 месеци, игра како да е десет години помлад. Модриќ не само што го издржа целиот натпревар, туку и најмногу истрча на теренот - дури 10,95 километри.
„Модриќ од Бензема направи Меси“
Marca вака ја опишува одличната асистенција на Модриќ за вториот гол на Бензема: „Тој одлично центрираше, но и му даде голем предизвик на Бензема со вака испратената топка. Сепак, тој одлично одговори на ракавицата што Модриќ му ја фрли“.
Со овој центаршут, тој му овозможи на Бензема да стане наследник на Меси или совршена копија на неговиот незаборавен гол во финалето на Лигата на шампионите против Манчестер Јунајтед во 2009 година. Французинот сега постигна гол на центаршутот на Хрватот како и Аргентинецот пред 13 години“.
Весникот не штедеше пофалби за Модриќ: „Тој не само што му асистираше на Бензема за голот, туку генерално секогаш наоѓаше простор во контрите, како на пример кога перфектно му асистираше на Винисиус, но тој не успеа да постигне гол. Зачудувачки е како ветеранот Модриќ непотресен го издржува интензитетот на олку големи натпревари“.