Поразот и елиминацијата од Реал Мадрид во осминафиналето на Лигата на шампионите тешко им падна на сите во Пари Сен-Жермен, а шпанскиот весник пренесува и за тепачка по натпреварот.
По натпреварот, како што пренесува шпанска Marca, дури дошло и до физичка пресметка во соблекувалната на актуелниот вицешампион на Франција.
Според овие наводи се степале Нејмар и голманот Џиџи Донарума. Сѐ започнало кога Бразилецот му префрлил на италијанскиот голман за лошата реакција и голема грешка при првиот гол, што практично го врати Реал во живот.
Италијанецот не молчел и веднаш му одговорил на Нејмар. Прво влегле во жестока расправија, а потоа паднале и неколку удари, пред да интервенираат нивните соиграчи и да ја прекинат тепачката.
ПСЖ годинава остана без можност да се бори за трофејот кој очајно одамна го посакува. Очигледно е дека голем број ѕвезди на едно место не можат да функционираат на вистински начин.
Со елиминацијата од Лигата на шампионите ПСЖ ќе има нова разочарувачка сезонава бидејќи моментално е во игра само за еден трофеј - оној во француската Лиг 1. Претходно испадна од Куп де Франс во осминафиналето губејќи на пенали од Ница, а на почетокот од сезонава го загуби и францускиот Суперкуп кој замина во витрините на Лил.
ПСЖ никогаш во историјата ја нема освоено Лигата на шампниоте, што е и цел на богатиот газда кој досега не жалеше финансиски средства за од „Светците“ да направи конкурентен тим. Минатото лето ги донесе Лео Меси, Серхио Рамос, Ашраф Хакими и Џанлуиџи Донарума, но и покрај тоа клубот бележи разочарувања и барем до наредната сезона ќе остане на она единствено финале од пред две сезони, кое и го загуби од Баерн.
