Бурното преземање на Twitter од страна на Илон Маск и вчера продолжи да предизвикува конфузија во јавноста, посебно по оставките на првите луѓе на оваа социјална мрежа и реткото предупредување од американската антимонополска агенција (FTC).
-Со голема загриженост ги следиме најновите случувања на Twitter. Ниту еден извршен директор или компанија не е над законот, изјави портпаролот на регулаторот FTC.
Портпаролот потсети дека платформата мора да биде во согласност со одредени правила, согласно условите од договорот потпишан со Агенцијата за безбедност и доверливост на податоците.
Договорот, што беше изменет годинава, „ни дава нови алатки за да се увериме дека тој ќе се почитува и ние сме подготвени да ги искористиме“, додаде портпаролот, мислејќи на казната што може да ја наложи FTC.
Сопственикот на Tesla и на SpaceX пред една недела отпушти половина од вкупно 7.500 работници на калифорниската компанија, десет дена откако го презеде и стана нејзин единствен извршен директор.
Стотици други вработени си заминаа уште летово, а оставките на раководството на компанијата продолжија и минатата недела. Washington Post пишува дека неколку директори си заминале, вклучувајќи ги и раководителите за доверливост на податоците и деловно усогласување.
Маск загрижува многу власти, огласувачи, организации за заштита на малцинствата и корисници.
Тој постојано се обидуваше да ги смири сите со напомена дека не е променето модерирањето на содржините и заштитата од злоупотреба на платформата.
Но, одлуките што ги носи на брзина и неговите провокации на Twitter веќе две недели поттикнуваат различни контроверзии.
