Планинскиот венец Анди, кој ги мами скијачите во Јужна Америка, оваа година бележи историски ниски врнежи од снег, објави денеска Reuters, потсетувајќи дека земјата веќе една деценија доживува голема суша која научниците ја поврзуваат со глобалното затоплување.
Врвовите на многу величествени планини помеѓу Еквадор и Аргентина беа покриени само со парчиња снег годинава или воопшто не беа под снежна покривка, откривајќи ја исушената кафеава земја.
Поради ниските врнежи од дожд и повлекувањето на мразот низ оваа област, местата каде што снабдувањето со вода зависи од планините, најверојатно ќе се соочат со недостаток, вели Рикардо Вилалба, водечки истражувач во Аргентинскиот институт за снег, глечери и студии за животна средина (IANIGLA).
„Тука сме сведоци на процес на долгорочно намалување на врнежите, односно мегасуша“, рече Вилалба.
„Кога ги гледате нивоата на врнежи за целата Кордилјера, ви покажуваат дека воопшто не паднал снег или наврнало многу малку“, додаде тој.
Зимата сега е на јужната хемисфера, кога снежните врнежи треба да бидат обилни. Скијачките центри се отворени, но претежно покриени со вештачки снег.
Мразот на Андите брзо и драматично се повлекува
Сателитските снимки од јули 2020 година и оваа година јасно покажуваат намалување на снежната покривка, што се рефлектира и на нивото на водата во реките.
Мразот на Андите, чија површина остана со иста големина помеѓу 2000-2010 година или дури и се зголеми, сега брзо и драматично се повлекува, истакнува Вилалба.
Ова, рече тој, за жал се случува со сите мразни површини на Кордилјера и е тесно поврзано со глобалното затоплување што влијае на целата планета.
