Бројот на сателити во земјината орбита брзо расте, а со тоа и опасноста од судир кој со верижна реакција би можел да предизвика голема штета на Земјата, поради што е потребен глобален „закон за сообраќај во вселената“, вели директорот на ЕСА, Јозеф Ашбахер.
Во орбитата на Земјата има 8.800 активни сателити, наведува Европската вселенска агенција (ЕСА). Тоа вклучува и големи „созвездија“ - цели „кластери“ на сателити кои имаат заедничка намена.
Една од задачите на тие „мегасателитски соѕвездија“ е, на пример, на целата планета да ѝ обезбедат широкопојасен интернет.
Најголемиот оператор, со повеќе од 5.000 сателити Starlink, е американската компанија SpaceX на милијардерот Илон Маск. Компанијата планира да го зголеми тој број на дури 42.000 сателити.
Ашбахер за германската агенција DPA изјави дека во интерес на сите сателитски оператори е да се избегнат судири, пренесоа германските медиуми.
Поради тоа ЕСА е во секојдневен контакт со сите за да се избегнат опасни ситуации и да се постигне договор за тоа кој има „право на првенство“ на рутите во орбитата.
„Меѓутоа, секој ден се приклучуваат нови актери“, вели Ашбахер.
Затоа, според него, потребна е сигурна правна „сообраќајна“ регулација во просторот, со што во секоја ситуација ќе биде јасно кој како треба да се однесува, а кој има првенство на минување.
Компаниите како One Web, SpaceX и многу други, на пример од Кина, планираат во наредните години да лансираат десетици илјади нови сателити, кои главно ќе бидат поевтини за производство и ќе тежат меѓу 150 и 2.000 килограми.
Затоа ЕСА си постави задача драстично да го ограничи постоењето на „ѓубре во орбитата“ до 2030 година. Според Ашбахер, секој лансиран сателит треба безбедно да се отстрани од орбитата на крајот од неговиот животен век.
Колку можат да бидат деструктивни деловите од старите сателити се покажа кога во 2007 година Кина со проектил уништи еден од искористени метеоролошки сателити во орбитата. Се создадоа 40.000 фрагменти поголеми од еден сантиметар, а сателитите на ЕСА мораа да маневрираат за да ги избегнат, бидејќи судир со толку мал, но многу брз објект може да предизвика голема штета.
