Стратегот на Болоња му се налути на Sky кој за изненадувачкиот пораз на Интер од неговиот тим во преден план го стави киксот на гигантот, наместо подвигот на Болоња.
По синоќешниот пораз на домашен терен од Сасуоло со 1:2, Синиша Михајловиќ одби да даде изјава за новинарите на Sky Calcio.
Тренерот на Болоња откри зошто почнал да го бојкотира најпознатиот италијански спортски канал. Популарната емисија „L'Originale“ на Sky, каде се анализираат калчо натпреварите, според Михајловиќ го бојкотирала неговиот тим и не му дала никаква пофалба за победата. Напротив, анализирале само зошто Интер загубил.
„Со играч помалку успеавме да победиме. Беше гостин и Бергоми, меѓу другите и половина час ги слушав како зборуваат и ниту еднаш не кажаа ниту еден збор за Болоња. Тоа е срамота, небаре се Inter Channel. Срамота, пола саат за Интер, а ниту збор за Болоња. Ниту еден не одвои ни минута да каже нешто“, налутено изјави Михајловиќ за La Gazzetta dello Sport.
Во неделата Болоња изненадувачки триумфираше на „Меаца“ над Интер со 1:2, а неговиот тим иако губеше со 1:0 потоа двата гола ги постигна со 10 играчи.
Водителот на Sky, Алесандро Бонан, проба да ја разјасни ситуацијата.
„Аназизата беше за чудниот резултат на Интер. Натпреварот се играше од 17:15, а емисијата беше доцна вечерта, така што не беше по натпреварот туку беше коментар каде се зборуваше за срамниот пораз на Интер. Жал ми е што Михајловиќ избрза со такво зборови“.
