„Црвеноцрните“ од Милано се сериозно заинтересирани за офанзивецот чиј договор со Јунајтед завршува во јуни.
Според информациите кои ги пренесуваат италијанските медиуми, Милан сака да ја искористи ситуацијата откако странува сѐ појасно дека Лингард нема да потпише нов договор. Манчестер Јунајтед е заинтересиран за продолжување на соработката, но играчот упорно одбива и е решен да си замине.
Џеси Лингард може да игра и како офанзивен играч од средиот ред, но и како крило, што му дава дополнителни опции на Милан во офанзивата. Со оглед на тоа што би пристигнал беспари, за „Росонерите“ тоа е добитна комбинација - солиден нов играч без трошок за отштета.
Причината поради која Лингард е решен да го напушти „Олд Трафорд“ е малата минутажа која ја добива во клубот. Сезонава или влегува од клупа, или преседува на клупата, а само еден натпревар го почна од почеток и тоа во Лига купот. Минатата сезона втората полусезона ја мина како позајмен во Вест Хем, каде беше стандарден.
Лингард е дете на Јунајтед кое излезе од академијата на клубот. Досега освен во Вест Хем има играно како позајмен и во Лестер Сити, Бирмингем Сити, Брајтон енд Хоув Албион и Дерби Каунти.
Евентуалниот трансфер во Милан не само што би му бил прв во кариерата, туку и за прв пат би го напуштил Островот.
Од 2016 е репрезентативец на Англија со 32 одиграни натпревари и 6 голови, но отпадна од списокот за ЕУРО 2020, а месецов не беше повикан токму поради минутажата во Јунајтед. Играше на Мундијалот во Русија во 2018 кога Англија го освои 4. место.
На 15 декември ќе наполни 29 години.
