Во 33. коло од Серија А, на „Сан Сиро“ фудбалерите на Милан ја победија Џенова со 2:0 и на тој начин му побегнаа на Интер на два бода.
Избраниците на Стефано Пиоли не одиграа премногу убедлив натпревар, но сосема заслужено победија со головите на Рафаел Леао во 11. минута и Жуниор Месијас во 87. минута.
Милан по двете последователни ремија без голови против Болоња и Торино дојде до победа, но има два бода предност пред Интер со натпревар повеќе од најголемиот ривал. Интер во петокот ја победи Специја на гости со 3:1 и бранителот на титулата сè уште одлучува за себе.
Преостанатиот натпревар Интер го игра на гостување кај Болоња на 27 април, а претходно следниот викенд ќе се сретне со Рома на Мурињо. Освен средбата со „Римјаните“, Интер нема тежок распоред до крајот на првенството.
Од друга страна, Милан до крајот на првенството ќе игра против Лацио, Фиорентина, Верона, Аталанта и Сасуоло. Милан и Интер во вторник ќе ги одиграат полуфиналните натпревари од Купот на Италија.