Селекторот на македонската фудбалска репрезентација, Благоја Милевски, на денешната официјална прес-конференција зборуваше за утрешниот почеток на квалификациите за пласман на ЕУРО 2024.
Македонија доби почеток по мерка бидејќи стартува со, условно кажано, лесна задача дома против аутсајдерот Малта. Во групата се и Италија, Англија и Украина.
„Анализите кои ги правевме се од последните четири натпревари на Малта, но тоа не мора ништо да значи дека така ќе биде на следниот дуел, затоа што имаат нов селектор, но играчите се тие. Се работи за квалитетна репрезентација, со квалитетни индивидуални карактеристики на играчите. Имаме максимален респект кон противникот, но ќе нагласам, сето она што ќе се случува на натпреварот зависи во најголема мера од нас самите. Кога ги гледам момците како изгледаат, повеќе од уверен сум дека ќе тргнеме успешно во овие квалификации. Но, во денешниот фудбал фаворити не постојат, ќе мора да се вложиме максимално за успех“.
Селекторот се осврна и на разочарувачките игри во завршениот циклус Лига на нации каде Македонија заврши на третото место во групата зад Грузија и Бугарија, а успеа да слави победи само против аутсајдерот Гибралтар.
„Лигата на нации дојде после одлични мундијалски квалификации во кои првпат бевме втори, после два извонредни баражи за Светско првенство, па имавме проблеми со составот. Реалноста е таа, дека имаме 20 до 25 фудбалери кои се конкурентни, но за жал не ги имавме сите играчи на располагање. Додадовме 12 дебитанти на кои им треба време за аклиматизација на сѐ што се бара во националниот тим. И тие натпревари ги искористивме за да создадеме хемија помеѓу помладите и искусните, а од собир до собир изгледаме сѐ подобри како тим. Затоа не гледам причина зошто да не напредуваме. Тоа е главната цел, а имаме и противници кои се предизвик, ќе се потрудиме да одговориме на најдобар начин“, анализираше Милевски.
Натпреварот Македонија - Малта се игра в четврток од 20:45 часот, а македонските фудбалери ќе истрчаат во новата гарнитура дресови.
