Македонската фудбалска репрезентација до 21 година загуби вечерва на гостувањето во Белград од Србија со 2:1 (1:0) во рамки на 7. коло од квалификациската групата Х за пласман на Европското првенство 2023.
Србија имаше одличен старт на натпреварот под водство на новиот селектор Горан Стевановиќ и поведе веќе во 9. минута преку Милош Пантовиќ.
Македонските фудбалери настојуваа да дојдат до израмнување на резултатот, но се најдоа во нови проблеми во 67. минута, кога поради два жолти картони беше исклучен Бесир Исени.
Србија ја валоризираше предноста од фудбалер повеќе во 82. минута преку Немања Јовиќ, а избраниците на селекторот Драги Канатларовски иако веќе во следниот напад ја намалија предноста на домаќините со голот на Бојан Димовски, сепак, немаа сили до крајот да извлечат бод од гостувањето во Белград.
Македонската репрезентација со овој пораз остана на 6 бодови и сега е четвртопласирана во групата пред следниот дуел во вторник во Скопје против Фарски Острови.
