Инвестициската банка Morgan Stanley соопшти дека падот на цените на обврзниците, зголемената рецесија во земјата и воведувањето санкции ја намалуваат веројатноста дека Русија ќе може да го исплати надворешниот долг.
„Веруваме дека најверојатното сценарио е Русија да не може да ги исполни своите обврски“, напиша вчера Симон Вејвер, глобален шеф на кредитна стратегија за пазарите во развој, според Bloomberg.
„Во случај на непочитување, ситуацијата во таа земја би можела да биде слична на онаа во Венецуела“, додаде тој.
„Веќе на 15 април Русија би можела да се најде во ситуација да не може да го исплати својот надворешен долг, што би било крај на 30-дневниот период за исплати што руската влада ги должи на обврзниците во долари кои доспеваат во 2023 и 2043 година“, рече Вејвер.
Според податоците собрани од Bloomberg, индикативните цени покажуваат дека инвеститорите ги проценуваат обврзниците од 2023 година на околу 29 центи за американски долар, што е најниската цена досега. Во деновите пред Русија да ја нападне Украина, долгот се тргуваше над номиналната вредност.
Иако ретко се случува државниот долг да падне на едноцифрен број, Morgan Stanley верува дека руските обврзници „би можеле да се доближат до тоа“. Либан и Венецуела се единствените неодамнешни примери за толку низок пад на долгот на една земја.
Morgan Stanley смета дека Русија можеби нема да може да го плати надворешниот долг поради санкциите наметнати од САД и ЕУ. Неизвесно е и дали на американските банки ќе им биде дозволено да примаат плаќања од руското Министерство за финансии.