Netflix ни ја заскокотка фантазијата во почетокот на месецов кога откри детали од снимањето на четвртата сезона на серијата „The Crown“.
Сега пристигна и долгоочекуваниот трејлер кој ја најавува премиерата на новата сезона, закажана за 15 ноември.
Заплетот за четвртата сезона „The Crown“ почнува кон крајот на 70-тите години на минатиот век. Кралицата Елизабета Втора (Оливија Колман) и нејзиното семејство се преокупирани со наоѓање невеста за принцот Чарлс (Џош О’Конор), кој сè уште не е оженет на 30-годишна возраст.
Во исто време, Велика Британија ја доби својата прва премиерка, Маргарет Тачер (Џилијан Андерсон), чиј однос со кралицата беше полн со тензии, особено за време на војната меѓу Велика Британија и Аргентина околу Фокландските Острови.
Иако романсата на Чарлс со младата лејди Дијана Спенсер (Ема Корин) им даде на луѓето своевидна бајка која им беше потребна во тоа време на криза, растеше раздорот во самото кралско семејство.
Првите три сезони на „The Crown“ се веќе достапни на стриминг платформата Netflix. Петтата сезона ќе ја има својата премиера во 2022 година. Веќе се знае дека австралиската актерка Елизабет Дебики ќе ја преземе улогата на Дијана, принцезата од Велс, во финалните две сезони на хит серијата на Netflix.
