Шпанскиот тенисер Рафаел Надал избори пласман во полуфиналето на Австралија Опен, откако утрово во драматичен меч го совлада Денис Шаповалов од Канада, со резултат од 3 : 2.
Жестока битка се водеше во мечот на четвртфиналето на Австралија Опен меѓу Денис Шаповалов и Рафаел Надал. Колку беше напнат мечот покажа и ситуацијата во која Канаѓанецот се побуни поради Шпанецот и неговото познато задржување на време во текот на сервис.
Првин му дофрлаше на Надал, па потоа и на судијата и тоа со навреди. Карлос Бернандеш имаше полни раце работа, особено затоа што Шаповалов во еден момент збесна и му порача дека е корумпиран.
„Мина скоро една минута, а тој и понатаму не е спремен да игра. Мора да го санкционираш тоа“, му рече Шаповалов на судијата.
„Види колку време му е потребно да се намести. Погледни колку долго време му треба, а јас бев спремен за сервис“, се пожали тој.
Судијата се налути и почна расправа со тенисерот, а тоа придонесе Шаповалов уште повеќе да збесне.
„Сите вие сте корумпирани“, изјави потоа тој.
На крајот Надал пријде до мрежата и побара од Шаповалов да му објасни во што е проблемот.
Во меч што траеше четири часа и 10 минути, Шпанецот поведе со 2 : 0 (6 : 3 и 6 : 4). Со иста мера возврати Шаповалов за изедначување (6 : 4 и 6 : 3). Во одлучувачкиот петти сет, Шпанецот беше поуспешен и победи со 6 : 3.
Надал по 36-ти пат ќе учествува во полуфинале на еден Грен слем турнир. Повеќе полуфиналиња од него имаат Новак Ѓоковиќ (42) и Роџер Федерер (46).