Цените на нафтата потонаа под 62 долари на меѓународните берзи денеска, под притисок на стравувањата дека новите локдаун мерки и бавната вакцинација на граѓаните против COVID-19 во Европа ќе го запрат обновувањето на побарувачката на енергија.
На лондонската берза цената на барелот потона за 2,69 долари во споредба со претходното затворање, на 61,93 долари. На американската берза, барел нафта се тргуваше за 2,47 долари пониско, на 59,06 долари.
Берзите се вознемирени од најавените локдаун мерки во Европа поради третиот бран на пандемијата и ширењето на новите варијанти на коронавирус. Германија, најголемиот потрошувач на нафта во Европа, одлучи да го продолжи локдаунот до 18 април, повикувајќи ги граѓаните да останат дома за да го запрат третиот бран на пандемијата.
Германската одлука беше проследена со едномесечна блокада во Франција, која зафати скоро третина од граѓаните од саботата, по скокот на бројот на новоинфицирани во Париз и некои региони на северот на земјата.
„Континентална Европа ги засилува мерките против коронавирусот и со тоа дополнително ја ограничува мобилноста. Ова веројатно ќе има соодветно негативно влијание врз побарувачката на нафта“, проценуваат аналитичарите на Commerzbank.
Цените ги турка и посилниот долар, бидејќи ја ослабува куповната моќ на имателите на други валути, а со тоа и побарувачката за нафта, чии цени се изразени во американски долари.
И структурата на пазарот сигнализира слабост, бидејќи цените во договорите за испорака следниот месец за прв пат од почетокот на годината беа пониски од оние во договорите за подолга испорака, што може да ги охрабри трговците да складираат нафта, посочува Reuters.
Организацијата на земји извознички на нафта (ОПЕК) утрово на својата веб-страница објави дека цената на барел од референтната корпа на нејзините членки во понеделникот изнесува 63,22 долари, што е за 75 центи повеќе од претходниот трговски ден.