Зарем има ќоше во светот каде фудбал не се игра? Има! Но, не за долго.
Република Маршалски Острови е суверена држава откако прогласи независност од САД во 1979 година, а членка е на Обединетите нации од 1991. Има нешто над 42 илјади жители од кои 96% се домородни Маршалци, а останатите Филипинци и американски и европски доселеници.
Галерија: Убавините на Маршалските Острови
Она што е интересно за оваа пацифичка земја, освен тоа што Илон Маск и неговата SpaceX го користат островот Омелек за лансирање на ракетите Falcon, е тоа што оваа држава не сака фудбал. И не само што не го сака, туклу воопшто не го практикува. Маршалските Острови немаат никакво фудбалско натпреварување од проста причина што овој спорт таму е страшно непопуларен.
Но, тоа полека се менува. Во 2020 година беше формирана Фудбалската федерација на Маршалските Острови (МИСФ) со прва цел популаризација на фудбалот, а крајна формирање на фудбалска репрезентација која ќе се натпреварува под капата на ФИФА. МИСФ сѐ уште не е членка ниту на ОФЦ ниту на ФИФА, но тоа во иднина ќе се промени.
МИСФ започна со GoFundMe кампања со цел собирање финансии за набавка на опрема, а веќе е завршена и пренамената на стадионот „Маџуро“ на кој сега може да се играат и фудбалски натпревари. Инаку, стадионот е именуван според главниот град Маџуро. Веќе се претставени и дресовите на националниот тим, чиј примерок ќе биде вредна алка за колекционерите на дресови од фудбалски репрезентации.
Се очекува репрезентацијата на најновата фудбалска земја годинава да го има своето огнено крштевање. Имено, начелно е договорен пријателски натпревар против Микронезија, уште една независна држава која не е членка на ФИФА, но која веќе има мало искуство со играње натпревари. Сѐ уште не е дефиниран датумот на одигрување, но се очекува тоа да биде до јуни.
МИСФ објави дека селектираните репрезентативци веќе се подготвуваат за големиот ден.
Во меѓувреме, во државата во декември 2023 започна првенство во футсал.
