Си купивте нова кошула и едвај чекате да ја облечете и прошетате со неа, но сепак е подобро да бидете малку трпеливи бидејќи тоа може да ви предизвика низа проблеми. Пофалбите и комплиментите за добриот изглед нема да ви помогнат со црвенилото и чешањето на кожата следниот ден.
Тоа црвенило се вика алергиски дерматитис и е предизвикан од одреден алерген. До реакција веројатно нема да дојде моментално, туку следниот ден или по неколку дена. Оваа реакција најчесто ја предизвикуваат боите на облеката.
Ваквите бои најчесто се користат на синтетички материјали како полиестер и најлон. Боите се ослободуваат од материјалот во текот на потење и триење од него. Ваквите реакции може да се избегнат со перење на облеката пред носење, со што вишокот се отстранува.
Но, алергискиот осип не е единствената негативна реакција која новата, неиспрана облека може да ја предизвика. Во 2014 година научници од Универзитетот во Стокхолм тестираа парчиња облека со различни бои, од различни материјални, произведувачи и цени.
Во 29 од 31 парче облека пронашле хемикалија наречена кинолин која Агенцијата на САД за заштита на животната средина ја прогласи за „потенцијално канцерогена за луѓе“, иако уште не се спроведени истражувања кои тоа го потврдуваат. Според истражувачите, пронајдени се и други канцерогени хемикалии, но не постојат доволно истражувања за внесување на наведените хемикалии преку кожата.
„Во ваш интерес е да ја исперете облеката пред носење“, вели Дејвид Ендрус, научник кој ги истражува хемикалиите за отстранување дамки, за подобрување на бојата и слично. Вели дека произведувачите не наведуваат кои хемикалии ги користат за облеката, а истите се потенцијално опасни за луѓето, но може да бидат штетни и за околината.
„Неверојатно е што кога ќе купите маичка на која е наведено дека е 100% памук, никаде не е наведено кои хемикалии ги содржи“, вели тој.
