Бразилскиот виртуоз повторно е во центарот на вниманието вон сезона, но не поради познатите забави, туку поради паричната глоба што му ја изрекоа бразилските власти за вештачкото езеро што без дозвола си го изградил на својот имот во Бразил.
Имено, асот на ПСЖ на својот имот во гратчето Мангарачиба без да добие дозвола од властите си иградил вештачко езеро и ги прекршил законите за заштита на животната средина. Поради тоа заработи казна од 16 милиони реали, што е еквивалентно на 3,05 милиони евра.
Нејмар има право на жалба кое истекува за 10 дена, но тешко дека ќе може да се оправда како без да извади дозвола изградил вештачко езеро, притоа и го променил природниот тек на околните реки, нормално, и тоа без дозвола, а и ја уништил вегетацијата која не била дел од неговиот имот.
Бразилските медиуми пренесуваат дека обвинителството во Мангарачиба навело над 10 прекршоци кои ги направил бразилскиот репрезентативец.
Инспекцијата прво добила неколку пријави, а кога екипите излегле на терен затекнале работници на имотот на Нејмар како го уредуваат вештачкото езеро и неговата плажа.
Имотот на Нејмар, вреден милијарди, се наоѓа во крајбрежното гратче Мангарачиба, јужно од Рио де Жанеиро. Има околу 45 илјади жители. Градот е познат по тоа што делови од филмот „The Expendables“ на Силвестер Сталоне се снимаа во неговиот центар.