Кингсли Коман ја игра својата 11-та професионална сезона во кариерата, а зад себе има 10 лигашки титули во три различни првенства.
Парижанецот, чии родители емигрирале во Франција од карипските острови Гваделуп, зад себе има феноменална кариера, а има само 26 години (на 13 јуни ќе полни 27).
Тој буквално во секоја сезона од својата досегашна кариера на професионално ниво ја завршуваше со титула за шампион во лигите каде што настапуваше.
И тој успех има уште поголема тежина ако се знае дека подвигот го изведе носејќи ги дресовите на ПСЖ, Јувентус и Баерн, три великани кои настапуваат во топ 5 најдобрите европски лиги (Лиг 1, Серија А и Бундеслига). Оваа сезона ја брка својата 11-та титула во низа, а со оглед на тоа што неговиот Баерн е прв на табелата, постои голема можност да ја продолжи оваа неверојатна низа.
Сите лигашки титули по сезона на Коман:
2012/2013: Лиг 1 (ПСЖ)
2013/2014: Лиг 1 (ПСЖ)
2014/2015: Серија А (Јувентус)
2015/2016: Бундеслига (Баерн)
2016/2017: Бундеслига (Баерн)
2017/2018: Бундеслига (Баерн)
2018/2019: Бундеслига (Баерн)
2019/2020: Бундеслига (Баерн)
2020/2021: Бундеслига (Баерн)
2021/2022: Бундеслига (Баерн)
За разлика од клупските успеси, на репрезентативно ниво не може да се фали на ист начин. Со Франција загуби две финалиња - она на ЕУРО 2016 и она на Мундијалот во Катар 2022 кога беше и еден од трагичарите бидејќи промаши пенал. А, пак, кога Франција стана светски шампион во 2018 година, Коман не беше на Мундијалот поради повреда.
