На гостувањето во Верона тимот на Антонио Конте ремизираше 2:2 со што ѝ дозволи на Аталанта да го преземе третото место.
Дека Интер повторно ќе се мачи најави самиот почеток на натпреварот бидејќи во тек беше само 2. минута кога Дарко Лазовиќ се прошета по левата страна, лесно го надмудри Милан Шкринијар и го совлада лошо поставениот Самир Хандановиќ.
Интер се мачеше во првиот дел, едвај доаѓаше до домашниот гол за разлика од Верона која пропушташе шанси за зголемување на водството. Мигел Велозу ја погоди стативата, додека ударот на Федерико Димарко за милиметри заврши покрај стативата.
По паузата Интер тргна поагресивно и уште во 49. минута Антонио Кандрева го израмни резултатот откако одбиената топка од стативата по ударот на Ромелу Лукаку дојде директно до него.
Набрзо потоа, во 55. минута Кандрева сакаше да нафрли, топката го погоди Димарко во градите, кој се обиде да блокира, и заврши во домашната мрежа измамувајќи го одличниот Марко Силвестри.
Кога сите помислија дека Интер ќе ја однесе победата, на 4 минути пред крајот Амир Рахмани одлично му сервираше на капитенот Велозу кој со прецизен удар ги постави конечните 2:2.
Со комплетирањето на 31. коло Интер сега падна на 4. место со 65 бодови, еден помалку од Аталанта која се искачи на 3. место. Верона го дели 8. место со Сасуоло, двата имаат по 43 бода.
