Новиот лидер на Конзервативната партија, Риши Сунак, денес ќе стане британски премиер.
Владата го објави денешниот распоред, според кој премиерката во заминување Лиз Трас во 9 часот по локално време ќе го има својот последен настап со кабинетот, по што треба да одржи говор пред Даунинг стрит 10, пренесе BBC.
Потоа, во 10:15 часот по локално време, Трас ќе замине во Бакингемската палата на последна аудиенција кај кралот Чарлс III, каде и формално ќе поднесе оставка.
Како нов лидер на Конзервативната партија, Сунак ќе замине во Бакингемската палата на прва аудиенција кај кралот Чарлс III, каде што ќе биде официјално побарано да формира влада. Новиот премиер потоа ќе одржи говор пред Даунинг стрит, што е планиран за околу 11:35 часот по локално време.
Сунак, со неговите 42 години, ќе биде првиот британски премиер со азиско потекло и најмладиот премиер во повеќе од 200 години.
Неговата биографија е навистина интересна, исто како и онаа на неговата сопруга Акашта Мурти. Таа е побогата од нејзиниот сопруг и самата е „тешка“ 500 милиони фунти. Брачниот пар поседува имот вреден 730 милиони фунти.
Тоа значи дека се побогати од кралот Чарлс. Риши и Акашта се во брак од 2009 година, се запознале на Стенфорд и заедно имаат две деца.
