Реал Мадрид објави видео од реконструираниот стадион „Сантјаго Бернабеу“ и покажа како изгледа по инвестицијата од 575 милиони евра. Слободно може да се каже - најмодерниот стадион во светот.
Кралскиот клуб ја започна реконструкцијата на својот стадион во 2019 година, а целта беше „Сантјаго Бернабеу“, кога сѐ ќе биде завршено, да стане модерно здание.
И иако реконструктивните работи доцнеа, Реал на социјалните мрежи пред натпреварот против Хетафе се пофали дека целата работа е завршена и со снимки од дрон покажа како изгледа новиот стадион. Има нов покрив, нова надворешност на стадионот и нов терен.
Прикажана е одличната архитектура на стадионот кој сега има футуристички изглед, а навивачите на Кралскиот клуб не се премногу разочарани што рокот за изградба и завршување на работите е продолжен за една година. Секако, работите на стадионот не се целосно завршени.
„Сантјаго Бернабеу“ доби подвижен терен кој ќе овозможи негово отстранување кога не се играат фудбалски натпревари и приспособување за други намени, како кошаркарски натпревари во Евролигата, одржување концерти и слично. И сето тоа за неколку дена.
„Ова е спектакуларна атмосфера, има нешто ново на нашиот стадион. Мислам дека навивачите ни помогнаа многу денес, а помогна и оваа малку позатворена атмосфера. Можеше да почувствувате дека навивачите им помогнаа на играчите и тоа ќе биде многу важно за иднината“, изјави Анчелоти по натпреварот.
Потсетуваме, Реал Мадрид направи пресврт и победи против Хетафе благодарение на голот на Џуд Белингам во судиското надополнување и со максимални четири победи остана прв на табелата во шпанската Ла Лига.