Во рамки на скринингот што заврши во Дебар, направени се околу 2.300 тестови, само кај 35 лица беа детектирани антитела, еден дел кои беа заболени, друг дел по случаен избор, соопшти министерот Венко Филипче.
Значи, еден мал процент граѓани имаат имунитет, што е уште еден доказ дека нашата стратегија да не се прави скрининг со серолошките тестови во оваа фаза, практично е успешна, заради тоа што не може да нè донесат до некаков посебен заклучок, за нешто што можеше да придонесе за димензионирање на мерките.
Ова денеска го истакна министерот за здравство Венко Филипче на прес-конференција на која информираше и за состојбата со COVID-19 во државава.
Во изминатите 24 часа, потенцира, направени се 113 тестови, односно вкупно се 17.359 тестирања од почеток на кризата.
– На Клиниката за инфективни болести и фебрилни состојби се примени двајца нови пациенти, вкупно се хоспитализирани 41, на кислородна поддршка се 21 пациент, а еден пациент е на респираторна машина. Во ГОБ „8 Септември“ се примени тројца нови пациенти, вкупно се хоспитализирани 24, на респираторна машина се пет пациенти и уште тројца се со нешто потешка клиничка слика. Во болницата во Битола се лекуваат четворица пациенти, во болницата во Штип, исто така – четворица, и во двата града се следат пациенти на домашно лекување. На инфективните одделенија во болниците во Прилеп, Велес, Куманово, Гостивар и Тетово се хоспитализирани 46 пациенти, додаде Филипче.
