Рами Абас Иса, агентот на Мохамед Салах, откри дека египетскиот фудбалер заработува дури 1,15 милиони евра на неделно ниво.
Во студијата на Бизнис школата на Харвард, Абас Иса даде податоци за вкупниот приход на Салах, а не само за неговата плата во Ливерпул.
„Конзервативно проценуваме дека вкупниот износ што Мохамед ќе го заработува во следните неколку години ќе биде помеѓу 54 и 62 милиони евра годишно. Тоа би било околу 1,15 милиони евра неделно“, се вели во извештајот.
Минатата година Салах го продолжи договорот со Ливерпул до 2025 година. Новиот договор го направи најплатен играч на Ливерпул во историјата, а покрај неговата плата од околу 24 милиони евра годишно, има и дополнителни приходи од спонзори како Adidas, PepsiCo, Gucci и египетската Bank of Alexandria.
Летово се шпекулираше за негово заминување во Саудиска Арабија. Се вели дека Ал-Итихад му понудил на Ливерпул 200 милиони евра, а на Салах неделна плата од 3 милиони евра. Сепак, „црвените“ ги одбија сите понуди и Салах остана на „Енфилд“.