Педесетгодишната актерка и активистка за права на животните Памела Андерсон во интервју за списанието „W“ зборуваше за нејзините синови, за соништата, за социјалните мрежи и нејзиниот однос со Џулијан Асанж. Фотографиите за прилогот сосема спонтано ги снимил нејзиниот пријател Лук Гилфорд.
Андерсон во интервјуто открива дека до неодамна имала многу негативно мислење за социјалните мрежи и дека Асанж ѝ објаснил дека е добро да има што е можно повеќе информации, но и да знае како да ја препознае вистината.
„Еднаш ги исклучив компјутерот и мобилниот телефон на шест месеци. Не ме интересираше тоа, добивав премногу информации. Но, не можеш да се бориш против новите технологии“, рече таа.
Иако на Instagram има 348.000 следбеници и секојдневно објавува разголени фотографии, таа тврди дека не сака да споделува премногу од својата интима на социјалните мрежи.
„Не ме интересира што јадат другите луѓе, каде одат, што прават. Објавувам свои секси фотографии, но професионални. Не се фоткам во огледало. Социјалните мрежи ги користам за промовирање добри нешта, како веганството и живот без крзно. Загрижена сум за младите луѓе чии вредности се темелат на бројот на следачи на социјалните мрежи.“
Таа исто така откри дека тоа е причината зошто ја пишува книгата „Sensual Revolution“ во која зборува за десензибилирањето. Важен дел од книгата ќе биде феминизмот за кој во последно време многу размислува, чита и се информира.
„Понекогаш ми приоѓаат луѓе и ми викаат дека конечно правам нешто со животот, а јас си помислувам: ‘Кретену, го правам тоа откако дојдов во Лос Анџелес.’ Од мала сум активистка за заштита на животните, а луѓето дури сега го забележаа тоа“, вели Андерсон во интервјуто.
Таа додава дека сака да чита, многу сака поезија и моментално го чита дневникот на Фрида Кало. Исто така рече дека учи француски бидејќи сака да се пресели на југот на Франција каде има многу пријатели.