Македонските фудбалски фанови можат да здивнат: Горан Пандев е на македонско тло и ќе биде во комбинација за баражот со Косово.
Најдобриот македонски фудбалер успеа да излезе од Италија и покрај решението за задолжителен карантин поради контакт со голем број на заразени лица. Дваесетина од таборот на неговата Џеноа се позитивни на коронавирусот, а Пандев иако имаше три негативни теста сепак мораше да оди во изолација.
Фудбалската федерација на Македонија со помош на тешка дипломатија успеа да издејствува Пандев да биде пуштен од Италија и тој веќе се наоѓа во Скопје. Притисок врз италијанските власти извршиле УЕФА и ФИФА, а помош имало и од македонска страна преку разни канали.
Селекторот Игор Ангеловски денеска од 17:30 часот ќе го одржи првиот тренинг со оние играчи кои ќе бидат на располагање денес.
Натпреварот против Косово се игра в четврток од 20:45 часот на „Тоше Проески“ во Скопје. Победникот од тој бараж потоа во ноември ќе игра финале за пласман на ЕУРО против Белорусија или Грузија.