Англискиот фудбалски прволигаш Њукасл Јунајтед е во потрага по нов спортски директор, а според италијанските и англиските медиуми тоа би можело да биде италијанската легенда Паоло Малдини (55).
Сè поизвесно е дека Ден Ешворт, актуелниот спортски директор, ќе се пресели на Олд Трафорд. Неговиот договор истекува во 2026 година, но Манчестер Јунајтед го бара веднаш и е подготвен да плати околу 10 милиони евра обештетување. Њукасл Јунајтед бара 20 милиони, а според сите сметки ќе најдат некаде измеѓу.
Малдини моментално е без договор, одби неколку понуди од Саудиска Арабија и стави до знаење дека е подготвен да започне нова авантура во некој европски клуб. Њукасл би можел да биде совршено решение бидејќи би му овозможило на Малдини да дојде во клуб кој нема финансиски проблеми.
Според Gazzetta dello Sport, Малдини многумина го сметаат за „тивок и компетентен глас на авторитет“ и е високо ценет од играчите кои го гледаат како икона на светскиот фудбал.
Англичаните наведуваат дека прв избор на Њукасл е Малдини, веднаш потоа Пол Мичел, поранешен играч на Саутемптон. На листата на кандидати се и Руи Педро од Бенфика, поранешниот спортски директор на Рома Тиаго Пинто и спортскиот директор на Спортинг, Иго Виана.