Папата Франциск денеска им порача на родителите на деца хомосексуалци дека не треба да ги осудуваат, туку да ги поддржуваат децата.
На неделната аудиенција, Папата зборуваше за тешкотиите со кои може да се соочат родителите при воспитувањето на своите деца.
Меѓу нив има родители „кои гледаат различни сексуални ориентации кај своите деца“ и размислуваат како „да се справат со ситуацијата, како да ги поддржат своите деца и да не се кријат зад осудувачкиот став“, рече Франциск.
Црквата не може да прифати истополови бракови, но ...
Папата претходно изјави дека хомосексуалците имаат право да бидат прифатени во нивните семејства. Франциск, исто така, рече дека иако Црквата не може да прифати истополови бракови, може да ги поддржи законите за истополови заедници кои на хомосексуалните партнери им даваат еднакви права во областа на здравствената заштита, наследството и пензиите.
Ватикан минатата година објави документ во кој се наведува дека на католичките свештеници не им е дозволено да благословуваат истополови заедници, што на големо негодување на геј католиците. Во некои земји, како што се САД и Германија, бискупите почнаа да го прават тоа, а сѐ погласни се повиците оваа пракса да се институционализира.
Конзервативните верници на Католичката црква, која има 1,3 милијарди следбеници, веруваат дека Папата испраќа различни сигнали за хомосексуалноста, што е збунувачки за верниците. Црквата учи дека хомосексуалците треба да се третираат со почит, и иако истополовите односи се грев, хомосексуалните склоности не се.
