Шведските политичари и функционери често до своите работни места патуваат користејќи јавен превоз. Нашиот претседател Стево Пендаровски мораше лично да го искуси тоа.
Ако кај нас се возат со службени автомобили дури и со платен возач, или скапи приватни, во скандинавската земја политичарите се на исто рамниште со обичниот граѓанин, како што и треба да биде.
Така, македонскиот претседател во манир на Швеѓанец го користеше јавниот превоз во Малме, од каде се возеше до Гетеборг и Стокхолм, а во возот доби и награда за тоа што со тој потег придонесе во зачувувањето на животната средина - се почести со фика, шведски десерт.
Ако за нас возењето на политичар со јавен превоз претставува вест на денот, во Шведска тоа е најнормална работа и слики од таков настан не завршуваат во медиумите. Но, Шведска за нас е друга планета.
„Не е ретка глетка да се видат шведски функционери како користат јавен превоз за да се движат низ и меѓу шведските градови. Всушност, тоа е претпочитаниот начин на транспорт низ цела Шведска за луѓе од сите возрасти и сфери на живот. Една од причините: грижа за животната средина, бидејќи возовите придонесуваат помалку за емисиите на јаглерод отколку авионските патувања“, пишува Шведската амбасада во Скопје по повод посетата на Пендаровски, за потоа да додаде:
„Среќни сме што и претседателот на Северна Македонија г-дин Стево Пендаровски ја користи шведската железница додека е во Шведска. За време на своето патување, придружуван од шведската амбасадорка г-ѓа Кристин Форсгрен Бенгтсон, тој имаше шанса да ужива во шведска фика со земички од цимет и кардамон. #ДалиЗнаеш дека 2021 година е европска година на возот🚆?“.
